"MeNhdi se rache tere haath"

[abrar ulhaq]

azizane mehfil meNhdi bahut khoobsurat hoti hai aur usse zyada khoobsurat hoti hai meNhdi ki rasm.  meri begum ko meNhdi  bahut pasand hai. aur use meiN ziu kar khusasan eid par meNhdi lagwane ke liye bhejta hooN. us pasmanzar meiN ek nazm arz hai.


MENHDI SE RACHE TERE HAATH MUJHE AB BHI YAAD HEIN.


MeNhdi se rache tere haath mujhe ab bhi yaad hai
rang-e-hina ki ye saugath mujhe ab bhi yaad hai
kangna kholne ki rasmaat mujhe ab bhi yaad hai
khoob ru rang-e-hayat mujhe ab bhi yaad hai

tere gore haathoN meiN aadhi rangeen ungliyaaN
meri poori qaaynat mujhe ab bhi yaad hai

khudaya in hathoN ki lakeeroN meiN meiN bhi maujud hooN
wo mahve-tamkeeN khayalaat mujhe ab bhi yaad hai

hina ke rang tere meri aankhoN mein qaid heiN
wo sahirana lamhaat mujhe ab bhi yaad hai

dikhe the surat ko teri dekhne se  pehle
meNhdi se rache tere haath,mujhe ab bhi yaad hai.

tere baad ke khatoN meiN, tujhko nahi maloom
the khushboo-e-hina ke safhaat,mujhe ab bhi yaad hai

ye rang bhi mitna tha, mit hi gaya
de gaya nukush-e-jazbaat,mujhe ab bhi yaad hai




abrar ulhaq

[abrar ulhaq]

a