GHazal: 'ahd baaNdhe the ga`e saal miCaalee phir se

[Aamir Abbas]

arbaab e suKHan, tasleemaat.
aaj hee ek aur vaaridaat hu`ee, so is ko bhee paRtaal ke liye pesh kar rahaa huN. aap kee tavajjuh kee ek nazar darkaar hai.

GHazal
=====

'ahd baaNdhe the ga`e saal miCaalee phir se
vaqt aayaa to nazar tum ne churaa lee phir se

munsifee dekhee tumhaaree to yahee aayaa KHayaal
dushmanee mujh se ko`ee tum ne nikaalee phir se

kunj meiN tair baGHaavat peh hu`e aamaadah
de ke Sayyaad ne KHooraak uThaa lee phir se

meree aaNkhoN meiN jo Soorat thee tiree, masKH hu`ee
yeh naheeN ret keh taSveer banaa lee phir se

'izzat e nafs se baRh kar naheeN hotee ujrat
yeh voh daulat  naheeN jo kho ke kamaa lee phir se

us ne samjhaa hee naheeN Haal miraa, ai :Aamir:
mujh se kehtaa hai GHazal likkhuN niraalee phir se


aap kee aaraa` kaa intizaar rahe gaa.

muKHlis
Aamir Abbas

[khurshidul Hasan Naiyer]

haaN sabaq paRh too Sadaaqat kaa micaalee phir se
hai zamaaN tairee imaamat kaa sawaalee phir se

yeh she'r to bas yuNhee ho gayaa.

muHtaram Aamir sb

salaam a'laikum

aik umdah Ghazal kee nazr hai meree naacheez see daad. she'r # 5 KhaaS pasaNd aayaa is ke lie,Y alag se daad or mukarrar daad pesh hai.

muKhliS

Khurshidul Hasan Naiyer

[hamidbaaqri]

Assalaam o alaikum
mohtaram aamir abbas saahib

aapki ghazal hameN pasand aayee.

dilee daad aur mubaarakbaad qubool farmaaiye .

allah(sbhnwt) kare zoray qalam aur ziyaadah.

iltemaase dua
hamid baaqri

[Sarwar A. Raz]

arbaab e suKHan, tasleemaat.
aaj hee ek aur vaaridaat hu`ee, so is ko bhee paRtaal ke liye pesh kar rahaa huN. aap kee tavajjuh kee ek nazar darkaar hai.

muHibbee Aamir SaaHeb: aadaab!

Ghazal naz^ar-nawaaz huyee. achhee koshish hai. daad! she'r-goyee kee yehee raftaar rahee to inshaa-Allah jald hee aap kee GhazloN kaa majmoo,a'h aa jaanaa chaahiYe. daad qubool keejiYe aur saath hee apnee kitaab ke KharedaaroN meN meraa naam peshagee hee likh leejiYe!

do ek baateN qaabil-e-Zikr naz^ar aayeeN. so likhtaa hooN. shukriyah! 

Sarwar A. Raz "Sarwar"

GHazal
=====

'ahd baaNdhe the ga`e saal miCaalee phir se
vaqt aayaa to nazar tum ne churaa lee phir se

mat^la' achhaa. daad!

munsifee dekhee tumhaaree to yahee aayaa KHayaal
dushmanee mujh se ko`ee tum ne nikaalee phir se

she'r pasand aayaa. doosre miSre' ko yooN bhee keh sakte haiN:

dushmanee kab kee hai yeh tum ne nikaalee phir se

kyaa Khayaal hai :muftiyaan-e-deen-e-mateen: kaa?   

kunj meiN tair baGHaavat peh hu`e aamaadah
de ke Sayyaad ne KHooraak uThaa lee phir se

Aamir SaaHeb! yeh kyaa she'r huwaa? pooraa she'r hee is qadar Ghareeb hai keh is par aap naz^ar-e-caanee Z^aroor kareN. KhaaS t^aur se :kunj meN t^air: aur :Khooraak: qaabil-e-Ghaur haiN!

meree aaNkhoN meiN jo Soorat thee tiree, masKH hu`ee
yeh naheeN ret keh taSveer banaa lee phir se

yeh nah ma'loom huwaa keh aaKhir Soorat kyoN masKh huyee. agar :dhuNdlaa: jaatee to kehte keh waqt yaa aaNsoo is kaa sabab huwe lekin :masKh: se kisee shiddat kaa iz^haar hotaa hai keh yeh jaan boojh kar aur GhuSSeh meN kiyaa gayaa hai. so aap dekh leN to harj naheeN hai.

'izzat e nafs se baRh kar naheeN hotee ujrat
yeh voh daulat  naheeN jo kho ke kamaa lee phir se

:ujrat: to kisee meHnat yaa Khidmat par dee jaatee hai. :huyee ujrat: ko :koyee daulat: se badal deN?

us ne samjhaa hee naheeN Haal miraa, ai :Aamir:
mujh se kehtaa hai GHazal likkhuN niraalee phir se

maqt^a' achhaa hai. u'moomee daad HaaZ^ir hai!

Sarwar A. Raz "Sarwar"

[aabarqi]

جناب عامر عباس صاحب
السلام علیکم

ھے بہت خوب یہ رفتار بقولِ سرور
لکھی عامر نے غزل ایک نرالی پھر سے

مجھکو اس درجہ پسند آئے یہ گلھائے سُخن
میں نے بھی ایک کلی اور کھلا لی پھر سے
مخلص
احمد علی برقی اعظمی

[Aamir Abbas]

haaN sabaq paRh too Sadaaqat kaa micaalee phir se
hai zamaaN tairee imaamat kaa sawaalee phir se

yeh she'r to bas yuNhee ho gayaa.

muHtaram Aamir sb

salaam a'laikum

aik umdah Ghazal kee nazr hai meree naacheez see daad. she'r # 5 KhaaS pasaNd aayaa is ke lie,Y alag se daad or mukarrar daad pesh hai.

muKhliS

Khurshidul Hasan Naiyer

mukarramee Naiyer saaHib, was salaamu 'alaikum
aap ko GHazal pasand aa`ee, mere liye baa'is e masarrat hu`aa. aap kee daad miltee hai to lagtaa hai keh sach much kuchh aisaa kahaa hogaa maiN ne . aap ke KHuloos aur daad ke liye shukrguzaar huN.

intiKHaab_kardah she'r ko pasand farmaane par KHusoosee shukriyah qubool keejiye. umeed hai keh aap se niyaaz Haasil hotaa rahe gaa.

muKHlis
Aamir Abbas

[Aamir Abbas]

Assalaam o alaikum
mohtaram aamir abbas saahib

aapki ghazal hameN pasand aayee.

dilee daad aur mubaarakbaad qubool farmaaiye .

allah(sbhnwt) kare zoray qalam aur ziyaadah.

iltemaase dua
hamid baaqri

muHtaram Hamid Baqari saaHib, was salaamu 'alaikum.
aap ko GHazal pasand aa`ee, samjiye meree meHnat vusool ho ga`ee. aap kee pur_KHuloos daad aur mubaarikbaad ke liye tah e dil se mamnoon huN.

Allah aap ko jazaa`e KHair de (aameen).

KHuloos_kesh
Aamir Abbas

[Aamir Abbas]

arbaab e suKHan, tasleemaat.
aaj hee ek aur vaaridaat hu`ee, so is ko bhee paRtaal ke liye pesh kar rahaa huN. aap kee tavajjuh kee ek nazar darkaar hai.

muHibbee Aamir SaaHeb: aadaab!

Ghazal naz^ar-nawaaz huyee. achhee koshish hai. daad! she'r-goyee kee yehee raftaar rahee to inshaa-Allah jald hee aap kee GhazloN kaa majmoo,a'h aa jaanaa chaahiYe. daad qubool keejiYe aur saath hee apnee kitaab ke KharedaaroN meN meraa naam peshagee hee likh leejiYe!

muHtarmee o mukarramee Sarwar saaHib, aadaab.
GHazal par aap kee daad kee muhr dekh kar masarrat se do_chaar hu`aa. she'r_go`ee kee raftaar? voh to bahot kam hai, ya'nee, maah_bhar meiN 8~10 GHazleiN, aur un meiN se bhee ek aadh hee Theek ho jaa`e to baRee baat. haaN, ek zamaanah thaa jab har roz kee ek GHazal pakkee thee...... kitaab kaa to mujhe aHbaab 12 saal se keh rahe haiN, magar abhee intizaar kar rahaa huN us din kaa jab ko`ee qaabil e ishaa'at taKHleeq ho jaa`e. phir, aap to jaante hee haiN keh yeh chhoTaa saa kaam bhee kitnaa mushkil aur vaqt_talab hai.

GHazal
=====

'ahd baaNdhe the ga`e saal miCaalee phir se
vaqt aayaa to nazar tum ne churaa lee phir se

mat^la' achhaa. daad!

matla' aap ko pasand aayaa, meree meHnat vusool ho ga`ee -- ab baaqee GHazal kee kis ko fikr hai... .
bahot mamnoon huN.

munsifee dekhee tumhaaree to yahee aayaa KHayaal
dushmanee mujh se ko`ee tum ne nikaalee phir se

she'r pasand aayaa. doosre miSre' ko yooN bhee keh sakte haiN:

dushmanee kab kee hai yeh tum ne nikaalee phir se

kyaa Khayaal hai :muftiyaan-e-deen-e-mateen: kaa?   

"kab kee" se yaqeenan she'r kee KHoobsooratee meiN izaafah hu`aa hai. tajveez ke liye shukrguzaar huN.
albattah do (2) baateiN haiN jo mujhe mujavvizah misr'e ko qubool karne meiN maane' haiN.

1. mujavvizah misr'e meiN "tum ne" pehle misr'e ke "tumhaaree" kee maujoodgee meiN izaafee meHsoos ho rahaa hai.

2. "dushmanee" ke saath "kab kee" lagne se Husn do_baalaa zaroor hu`aa, lekin "phir se" us kaa saath naheeN de paa rahaa. y'anee, "phir se" kaa to matlab yahee hu`aa keh pehle bhee dushmanee nikaalee ga`ee thee, so "kab kee" ke mafhoom aur KHoobsooratee se Takraa`o paidaa ho rahaa hai. aisaa meraa KHayaal hai.

agar "kab kee" ko shaamil karuN to misra' kee yeh soorat zehn  meiN aatee hai.
"dushmanee kab kee hai yeh mujh se nikaalee phir se"

kyaa yeh misra' darj e baalaa nuktah #2 ke e'tiraaz se bach paa rahaa hai, aap kaa kyaa KHayaal hai?

kunj meiN tair baGHaavat peh hu`e aamaadah
de ke Sayyaad ne KHooraak uThaa lee phir se

Aamir SaaHeb! yeh kyaa she'r huwaa? pooraa she'r hee is qadar Ghareeb hai keh is par aap naz^ar-e-caanee Z^aroor kareN. KhaaS t^aur se :kunj meN t^air: aur :Khooraak: qaabil-e-Ghaur haiN!

jee. ab dekhtaa huN to KHud bhee dobaarah sochne par majboor huN. ise ko behtar karne kee koshish karuNga, insha-Allah.
is taraf tavajjuh dilaane kaa bahot shukriyah.

meree aaNkhoN meiN jo Soorat thee tiree, masKH hu`ee
yeh naheeN ret keh taSveer banaa lee phir se

yeh nah ma'loom huwaa keh aaKhir Soorat kyoN masKh huyee. agar :dhuNdlaa: jaatee to kehte keh waqt yaa aaNsoo is kaa sabab huwe lekin :masKh: se kisee shiddat kaa iz^haar hotaa hai keh yeh jaan boojh kar aur GhuSSeh meN kiyaa gayaa hai. so aap dekh leN to harj naheeN hai.

meraa KHayaal yeh hai keh "dhundlaa" meiN soorat ke GHair_vaazeH hone (ya'nee bhool jaane) kaa mafhoom numaayaaN hai. jabkeh "masKH" meiN soorat bigaR jaane (ya'nee be_i'tibaaree yaa nafrat) kaa izhaar, aur yahee maqsood bhee hai. aap bajaa farmaate haiN keh soorat masKH hone kee vajh zaahir naheeN hai. yahaaN daanistah izhaar e tanaffur se ishaarah de kar baaqee mafhoom qaaree kee tab' e rasaa par chhoR diyaa hai.

'izzat e nafs se baRh kar naheeN hotee ujrat
yeh voh daulat  naheeN jo kho ke kamaa lee phir se

:ujrat: to kisee meHnat yaa Khidmat par dee jaatee hai. :huyee ujrat: ko :koyee daulat: se badal deN?

yahaaN GHam e rozgaar kaa zikr hai so "ujrat" kehnaa paRaa. yuN bhee "daulat" kee doosre misr'e meiN maujoodgee ke baa'is takraar ho jaa`e gee.

us ne samjhaa hee naheeN Haal miraa, ai :Aamir:
mujh se kehtaa hai GHazal likkhuN niraalee phir se

maqt^a' achhaa hai. u'moomee daad HaaZ^ir hai!

bahot shukriyah, muHtaram.


GHazal kee pazeeraa`ee aur is par tabsire ke liye aap kaa mamnoon huN. aap kee rahnumaa`ee mayassar rahee to kitaab kaa bhee kuchh nah kuchh ho hee rahe gaa.
aap kee maHabbatoN ke liye sipaasguzaar huN.

muKHlis
Aamir Abbas

[Aamir Abbas]

جناب عامر عباس صاحب
السلام علیکم

ھے بہت خوب یہ رفتار بقولِ سرور
لکھی عامر نے غزل ایک نرالی پھر سے

مجھکو اس درجہ پسند آئے یہ گلھائے سُخن
میں نے بھی ایک کلی اور کھلا لی پھر سے
مخلص
احمد علی برقی اعظمی

محترمی برقی صاحب، والسلام علیکم۔
جواب میں تاخیر کے لیے معذرت چاہتا ہوں۔ آپ کو میری کاوش پسند آئی، مجھے بہت خوشی ہوئی۔ آپ کی داد و تحسین ہمیشہ ہی میرے لیے حوصلہ افزا ہوتی ہے۔

غزل کی پزیرائی اور خاکسار کی حوصلہ افزائی کے لیے بہت ممنون ہوں۔

مخلص
عامر عباس